- Tað harmist eg um

Facebook gjørdi ikki nóg mikið til tess at forða fyri, at ein privat greiningarfyritøka brúkti persónligar upplýsingar hjá 87 milliónum Faceboook-brúkarum.

Tað viðgekk Mark Zuckerberg, sum stovnaði Facebook, í eini hoyring í amerikanska senatinum í gjárkvøldið.

- Tað harmist eg um, segði Zuckerberg. Hann segði, at Facebook er farin at kanna appir, sum sleppa fram at dátum hjá teimum, sum brúka Facebook.

Talan kann verða um tíggju túsund tals appir.

- Tað fer at taka tíð at gera neyðugu broytingarnar. Men eg havi skyldu til at gera tað á rættan hátt, segði 33 ára gamli Zuckerberg.

Hoyringin í senatinum í gjárkvøldið var tann fyrra, har stovnarin av Facebook slapp at greiða senatinum frá málinum. 

Seinna hoyringin verður í umboðsmannatinginum dag.

Herfyri kom fram, at greiningarfyritøkan, Cambridge Analytica, fekk atgongd til dátur hjá 87 milliónum Facebook-vangamyndum.

Hesar dátur eru eftir øllum at døma brúktar til at royna at ávirka amerikanskar veljarar á forsetavalinum í 2016.

- Vit fara at kanna út í sær, hvat Cambridge Analytica gjørdi, segði Mark Zuckerberg í senatinum í gjárkvøldið. 

Stutt eftir, at hoyringin varð byrjað, hækkaði virðið á partabrævinum í Facebook 4,6%, og tað er tað mesta, síðani gølan kom undan kavi.