Spanski landsliðsvenjarin fær fótin

13.06.2018 - 11:41
ÍtrótturFótbóltur
Spanski landsliðsvenjarin fær fótin
Spanski landsliðsvenjarin, Julen Lopetegui, hevur fingið fótin dagin fyri, at HM-endaspælið í Russlandi byrjar
Við Julen Lopetegui á odda hevur Spania ikki tapt ein tann einasta dystin. Nú er hann koyrdur.
Mynd: © Scanpix  
 

Á tíðindafundi fyrr í dag boðaði forsetin í spanska fótbóltssambandinum frá avgerðini.

- Vit eru noydd at veitra farvæl til landsliðsvenjaran. Vit ynskja honum bestu eydnu. Tey úrslit, sum Spania fer at røkka í hesum endaspælinum, eigur hann sín lut í, sigur forsetin Luis Rubiales.

Uppsøgnin verður mett sum ein beinleiðis avleiðing av, at Julen Lopetegui í gjár varð settur sum høvuðsvenjari í spanska stórfelagnum Real Madrid, har hann tekur við eftir Zinedine Zidane. 

Hesi tíðindi fullu ikki í góða jørð í spanska fótbóltssambandinum, og serliga Luis Rubiales, forseti, gjørdist í øðini.

Fyrst bórust tíðindini um, at partarnir vóru samdir um at fara hvør til sítt eftir HM-endaspælið, men í nátt hevur spanska fótbóltssambandið broytt avgerð og koyra tí venjaran beinanvegin. 

Tíðindafundurin í dag varð útsettur fleiri ferðir - sum skilst tí at fleiri av spælarunum á spanska landsliðnum til tað seinasta royndu at sannføra fótbóltssambandið um at halda fast í Lopetegui.

Julen Lopetegui tók við sum spanskur landsliðsvenjari eftir Vicente del Bosque í 2016. Síðani hann tók við, hevur Spania ikki tapt ein tann einasta dyst.

Ítróttarstjórin hjá spanska landsliðnum, Fernando Hierro, og U21-landsliðsvenjarin Albert Celades, eru í løtuni bestu boð upp á ein fyribilsvenjara. 

Spania spælir sín fyrsta dyst móti Portugal fríggjakvøldið. Hini liðini í spanska bólkinum eru Iran og Marokko.

Kringvarpið vísir flestu dystirnar í HM-kappingini, sum byrjar í morgin, tá Russland og Saudia Arabia hittast.

Tað verður klokkan 16. Dysturin verður vístur í sjónvarpinum og á heimasíðu okkara.

 
Nýggjastu sendingar í ÚV
Mikudag 16. oktober
LEITISSTEIN 14.10.2019 (1t)
99923
Mikudag 16. oktober
LEITISSTEIN 14.10.2019 (2t: GRACE 25 ÁR)
99922
Mikudag 16. oktober
Morgunlestur mikudagur 16. oktober 2019
99845
Týsdag 15. oktober
Breddin
99910
Týsdag 15. oktober
Nón 15.10.19 - tematýsdagur um vinaløg
99906
Nýggjastu sendingar í SV
Mánadag 14. oktober
3-2
99875
Sunnudag 13. oktober
Andakt við Mourits Mouritsen
99826
Sunnudag 13. oktober
Guðstænasta úr Argja kirkju
99828
Hósdag 10. oktober
Suni Merkistein hittir Bob Geldof
99745
Mikudag 9. oktober
Fótbóltur: Føroyar - Norra (kvinnur)
99695