Elektron skal reka talgilda samleikan

Elektron skal hýsa og reka talgilda samleikan, sum skal vera klárur hjá føroyskum borgarum at brúka næsta ár, tað hava Elektron og Gjaldstovan júst gjørt sáttmála um. 

Talgildi samleikin skal nýtast til at rita inn í allar skipanir hjá almennum stovnum, og við tíðini er ætlanin, at hann skal koma í staðin fyri NemID, sum nógv brúka at rita inn í bankarnar.

Ulla Joensen er stjóri í Elektron, og hon sigur, at leikluturin hjá Elektron verður at reka skipanina, sum Klintra og Føroya Tele eru í ferð við at menna.

Ein talgildur samleiki er, sambært Nicolai Mohr Balle, ið er verkætlanarstjóri fyri Talgildu Føroyar, ein eyðmerking, sum hvør borgari fær. Við eyðmerkingini fær borgarin sostatt atgongd til tær talgildu tænasturnar, sum verða veittar - fyrst og fremst av tí almenna, men Nicolai Mohr Balle sigur, at tænastan væntandi eisini verður bjóðað til privatar tænastuveitarar. 

Tað verður krav, at almennir stovnar skulu nýta talgilda samleikan. Tað vil eisini siga, at borgarar noyðast at nýta talgilda samleikan, um teir vilja rita inn í eitt nú skipanina hjá Taks.

- Tá ið talgildi samleikin er klárur at brúka, verður til dømis "MínLykil" beint burtur og talgildi samleikin kemur í staðin sum loysn til eitt nú at rita seg inn við, sigur Nicolai Mohr Balle. 

Talgildu Føroyar samstarvar eisini við týðandi privatar aktørar, sum helst eisini fara at brúka talgilda samleikan til innriting.

Talgildi samleikin verður væntandi klárur at taka í nýtslu seint í vár, sigur Nicolai Mohr Balle, verkætlanarstjóri fyri Talgildu Føroyar.