- Tíðindi, mentan og ítróttur
FIFA: Leggið dent á bóltin, ikki á kvinnurnar
Til teir báðar dystirnar, sum eru eftir av HM í Russlandi, skalt tú ikki vænta at síggja so nógv til vakrar kvinnur á áskoðaraplássunum til dystirnar. FIFA hevur heitt á tíðindastovur, ið vísa dystirnar, um at leggja størri dent á bóltin enn á vakrar kvinnur.
Margfeldisstjórin hjá FIFA, Frederico Addiechi, sigur, at FIFA nú fer at taka eitt prát við allar tíðindastovurnar, ið senda dystirnar.
Orsøkin til, at málið verður tikið upp, er, at tað undir HM í Russlandi hava verið fleiri sexistiskir tilburðir. Millum annað hava fleiri mannlig tíðindafólk gjørt seg inn á kvinnulig tíðindafólk á opnum skýggja.
Hetta er tó ikki fyrstu ferð, at málið verður tikið upp. Undir HM-endaspælinum í Brasilia fyri fýra árum síðani bleiv málið eisini viðgjørt.
Ongland og Belgia spæla um bronsu leygardagin. Og sunnudagin klokkan 16 føroyska tíð verður finalan millum Frakland og Kroatia.
Kringvarpið vísir finaluna beinleiðis í sjónvarpinum og á heimasíðu okkara.