Kennir seg illa viðfarnan og gevst á landsliðnum

24.07.2018 - 09:58
ÍtrótturFótbóltur
Kennir seg illa viðfarnan og gevst á landsliðnum
Mesut Özil skrivar á Twitter, at hann kennir seg illa viðfarnan av týska fótbóltssambandinum. Hann gevst nú á týska landsliðnum.
Mesut Özil kennir seg sum offur fyri rasismu og gevst millum annað av teirri orsøk á týska fótbóltslandsliðnum.
 

Tað hevur vakt ans millum týskar politikarar, at fótbóltsspælarin Mezut Özil hevur boðað frá, at hann gevst á týska landsliðinum.

Tað er eitt ávaringartekin, tá ið ein kendur fótbóltsleikari kennir seg sum offur fyri rasismu. Tað sigur týski løgmálaráðharrin, Katarina Barley, eftir at týski fótbóltsleikarin Mesut Özil hevur boðað frá, at hann ikki ætlar at spæla við týska landsliðnum aftur.

Tað skrivar dr.dk.

Mesut Özil skrivar á Twitter, at hann kennir seg illa viðfarnan av týska fótbóltssambandinum millum annað orsaka av vánaliga úrslitinum hjá týska landsliðnum í HM endakappingini.

Tað vakti ans, tá ið Özil, saman við einum øðrum týskum fótbóltsleikara við turkiskum uppruna, hitti turkiska forsetan Recep Erdogan í London undan turkiska forsetavalinum. Fundurin millum turkiska forsetan og fótbóltsleikararnar varð fyri nógvum atfinningum, millum annað frá týskum politikarum og týska fótbóltssambandinum. Forsetin í týska fótbóltssambandinum, Reinhard Grindel, ákærdi leikararnar fyri at lata seg misnýta til politiskan fyrimun fyri Erdogan.

Hetta hevur nú fingið Özil at taka seg úr týskum landsliðsfótbólti.

- Eg verið sæddur sum týskari, tá ið vit vinna, og sum turkur, tá ið vit tapa. Liðfelagar mínir við polskum uppruna fáa ikki somu viðferð. Er tað tí, at eg havi turkiskan uppruna? Tí eg eri muslimur? Rasisma kann ongantíð góðtakast, skrivar hann.

Sambært Katarinu Barley, løgmálaráðharra, er tað ein álvarslig støða, tá ið ein, sum hevur klárað seg so væl sum Özil, kennir seg óynsktan í Týsklandi og ikki kennir seg umboðaðan av politisku skipanini ella týska fótbóltssambandinum.

Týska fótbóltssambandið harmast um avgerðina, men vísir aftur, at Mesut Özil hevur fingið rasistiska viðferð.

 
Nýggjastu sendingar í ÚV
Leygardag 20. apríl
Morgunlestur leygardagur 20. apríl 2019
93392
Fríggjadag 19. apríl
Rómi og ross løgdu støðið (2:2)
93585
Fríggjadag 19. apríl
Guðstænasta úr Vesturkirkjuni
93674
Hósdag 18. apríl
Rómi og ross løgdu støðið (1:2)
93584
Nýggjastu sendingar í SV
Mikudag 24. apríl
25 minuttir: Andrias Høgenni
93252
Fríggjadag 19. apríl
Flogbóltur: Mjølnir - Fleyr, mansfinala
93685
Fríggjadag 19. apríl
Andakt við Bergtóri Hjelm Bjarkhamar
93684
Fríggjadag 19. apríl
Hondbóltur: H71 - Neistin, 3 finalan
93682
Fríggjadag 19. apríl
Guðstænasta úr Vestmanna kirkju
93686