- Tíðindi, mentan og ítróttur
BMW afturkallar bilar
Innkallingin kemst av einum tekniskum breki, sum hevur elvt til eld í 30 BMW-bilmoturum í Suðurkorea. Fyrr í ár vóru 106.000 bilar kallaðir á verkstað í Suðurkorea, og nú fer BMW eisini at kalla bilar á verkstøð í Evropa.
Tað skrivar týska blaðið Frankfurter Allgemeine Zeitung.
Enn er ikki greitt, um bilar seldir í Føroyum verða kallaðir á verkstað. BMW-bilarnir í Føroyum koma úr Danmark, sigur Gordon Rajani, stjóri í Nordcar, sum umboðar BMW í Føroyum, og enn eru bilar ikki kallaðir inn í Danmark.
Trupulleikin kemur møguliga av einum luti í útstoytinum á bilinum, og tað skal kannast og møguliga skiftast út.
Gordan Rajani greiðir frá, at vanliga mannagongdin er, at er okkurt brek við nýggjum bilum, verða teir kallaðir innaftur eftir einari fastari mannagongd og umvældir ókeypis.
Verkstaðsleiðari á Nordcar Valbjørn Mittelstein sigur, at tey í slíkum førum fáa boð úr Danmark, um okkurt brek er við BMW-bilum, men at eingin slík boð eru komin enn.
Bara í Týsklandi skulu 93.000 BMW-bilar á verkstað.