- Tíðindi, mentan og ítróttur
Fleiri lond hava heitasta summarið í øldir
Í nógvum londum verður sagt frá heitasta sumrinum í øldir. Nú ávarar eitt lið av altjóða granskarum um, at ein dominoeffekt kann fáa hitalagið í heiminum veruliga at taka dik á seg.
Ein mannaskapt upphiting upp á tvey hitastig kann føra til upp aftur størri upphiting av heiminum.
Í veruleikanum kann miðalhitin á jørðini gerast 4-5 stig hægri, og so kunnu høvini fløða millum 10 og 60 metrar eftir nøkrum hundrað árum.
Harvið er málið á tvey hitastig í veðurlagsavtaluni í París als ikki nóg mikið, staðfesta granskararnir í einari grein í viðurkenda tíðarritinum Proceedings of the National Academy of Sciences.
Sebastian Mernild, sum er professari í veðurlagsbroytingum við Nansen-sentrið í Bergen, sigur fyrsta dominofólkið longu verða fallið:
- Vit síggja longu nú, at metan miðsavnast í størri mongdum í atmosferuni, og metan spríkir upp í atmosferuna og økir upphitingina, sigur hann við DR.
Somuleiðis vísir veðurlagsfrøðingurin Jesper Theilgaard á, at ein dominoeffekt longu er farin í gongd.
- Vit hava altíð vitað, at tað var ein vandi fyri einari ávirkan, sum skapar eina dominoeffekt. Men at tað kann føra til 4-5 stig í hitaøking kemur kortini óvart á serliga eftir París-avtaluna, sigur Jesper Theilgaard, sum leingi hevur ávarað ímóti veðurlagsbroytingunum.