Býtt rossamakrelin um við tosk

Avtala er gjørd við ES um, at Føroyar fáa 450 tons av toski á Flemish Cap í ár og 450 tons næsta ár.

ES fær so føroysku kvotuna av rossamakreli í Suðurkyrrahavinum, sum í nógv ár ikki er fiskað. Talan er um kvotur í altjóða sjógvi. 

Býtið er fingið í lag, tí økisbundnu fiskiveiðifelagsskapirnir SPRFMO og NAFO loyva limalondunum at flyta kvotur sínámillum í einum fiskiári.

Umráðandi er at tryggja, at kvotan verður fiskað, og at tryggja at Føroyar fáa ágóða av kvotuni á annan hátt, um føroysk skip ikki fiska hana, sigur Fiskimálaráðið. 

Seinastu tvey árini hava Føroyar tí latið ES føroysku kvotuna fyri at tryggja, at hon verður brúkt.

Fiskimálaráðið ætlar, at tey 450 tonsini av toski í ár verða latin sum felagskvota til teirra, sum eftir gomlu lógini høvdu loyvi at fiska uppsjóvarfiski í altjóða sjógvi í Suðurkyrrahavinum. Kunngerð um hetta er send til hoyringar.