Vilja broyta arbeiðsskaðatryggingarlógina

Samferðslumálaráðið ætlar at leggja saman Vanlukkutryggingarráðið og Arbeiðs- og brunaeftirlitið á nýggjárinum. 

Uppskot um hetta er sent til hoyringar. Ætlanin er at broyta arbeiðsskaðatryggingarlógina.

Samferðslumálaráðið metir, at samanleggingin fer at hava nógvar ágóðar við sær. 

Vanlukkutryggingarráðið og Arbeiðs- og brunaeftirlitið arbeiða við tætt skyldum økjum um arbeiðsmarknaðarmál og hoyra bæði undir Samferðslumálaráðið. 

Bæði arbeiðsskaðatryggingarlógin og arbeiðsumhvørvislógin áseta fráboðanarskyldu viðvíkjandi arbeiðsvanlukkum. 

Hóast kravdu fráboðanirnar eru nærum eins, er einki samstarv um hesar fráboðanir. 

Ein umskipan ger, at tað bara verður neyðugt hjá arbeiðsgevaranum at boða frá hjá einum almennum myndugleika í staðin fyri hjá tveimum. 

Harumframt gevur umskipanin møguleikar at brúka pengarnar betur, tí talan verður millum annað bara um eina umsiting, sum varðar av abeiðsumhvørvisøkinum.