Tveir nevndarlimir skiftir í almennum partafelagi

Nevndin í P/f Sandoyar- og Eysturoyartunlum hevur fingið tvey nýggj fólk, Una Danielsen og Matheu Elisebeth Hilduberg.

Tey eru komin í staðin fyri Evy J. Jacobsen og Ewald Kjølbro.

Samferðslumálaráðið, sum eigur partafelagið, gjørdi eina innstilling til eykaaðalfundin.

Evy J. Jacobsen er fyribils forstjóri í Betri samtakinum, og samtakið kravdi, at hon segði frá sær nevndarsessin.

Ewald Kjølbro er stjóri í Landsverki, og Landsverk hevur eftirlit við arbeiðinum hjá P/f Eysturoyar- og Sandoyartunlum.

Samferðslumálaráðið heldur ikki, at sami maður, sum hevur ábyrgd av eftirlitinum, er í nevndini hjá felagnum, sum hann hevur eftirlit við.

Upprunaliga valdi Fíggjarmálaráðið Ewald Kjølbro í nevndina hjá tunlafelagnum.