Færri fiskidagar minka um veiðitrýstið

bannari
11.12.2018 - 13:15
AktueltVinna
Færri fiskidagar minka um veiðitrýstið
Eilif Gaard, stjóri á Havstovuni, sigur, at Havstovan mælir til at skerja fiskidagarnar munandi fyri at minka um veiðitrýstið, sum er í hægra lagi.
 

Allir óbrúktir dagar skulu takast inn, og ein triðingur av brúktum døgum skulu eisini takast inn. Tað er tilmælið frá Havstovuni til Fiskimálaráðið um fiskidagarnar fyri 2019.

Eilif Gaard, stjóri á Havstovuni, sigur, at tað kann tykjast ørkymlandi, at Havstovan mælir til at skerja fiskidagarnar munandi, nú stovnarnir eru við at koma fyri seg aftur, men tað er fyri at minka um veiðitrýstið, sum liggur í hægra lagi.

Høgt veiðitrýst

Fyri alt fiskiárið 2016-2017, ið verður brúkt sum grundarlag fyri tilmælið hjá Havstovuni, vórðu 59 prosent av teimum tillutaðu fiskidøgunum brúktir. Framskrivingar fyri 2018 vísa, at umleið 68 prosent av døgunum í ár fara at verða brúktir.

Havstovan metir, at nú meir er at fáa av toski og hýsu, er sannlíkt, at óbrúktir dagar gerast virknir, og tað kann hava við sær eitt hægri veiðitrýst og kann minka um tilgongdina av fiski, ið er á veg inn í stovnarnar.

Mett verður eisini, at veiðievnini hjá eitt nú línuflotanum økjast í næsta ár. Metingin byggir á tað, at tað sær út at verða ein minking í náttúrligari føði á landgrunninum, og tað hevur oftast við sær, at fiskurin tekur betur á. Tí kann væntast, at ein størri nøgd verður fiskað í næsta ár. Tað leggur afturat einum veiðitrýstið, sum longu er í hægra lagi.

Vinnuumboð mæltu frá niðurskurði

Ein roynd varð gjørd í gjár at finna eitt felags tilmæli at handa landsstýrismanninum, men hon miseydnaðist. Uppleggið, ið fundurin skuldi taka støðu til, var ein niðurskurður á 10 prosent, ið landsstýrismaðurin Høgni Hoydal hevði lagt fram. 

Í mun til Havstovuna, mæltu øll vinnuumboðini frá at skerja dagar. Í niðurstøðuni frá fundinum í gjár siga vinnuumboðini, at spurningurin um at stilla fiskidagatalið eigur at verða viðgjørdur í síni heild, tá bólkurin næsta ár fer undir at viðgera umsitingarætlanir o.a. í sambandi við at skipa fiskiskapin eftir botnfiski í føroyskum sjógvi.

Eilif Gaard sigur, at ein niðurskurður á tíggju prosent hevði ikki verið nóg mikið, men tað hevði bøtt um verandi støðu.

Fiskidagarnir skulu nú ásetast áðrenn fríggjadagin, tá tingið fer í jólafríð.

 
Nýggjastu sendingar í ÚV
Leygardag 27. februar
Frá fyrsta Smirli til í dag - 5. sending
120880
Leygardag 27. februar
Funnu kinesararnir Amerika (1:2)
120696
Leygardag 27. februar
Jambalaja 270221
120891
Leygardag 27. februar
Morgunlesturin leygarmorgunin 27. februar 2021
120517
Fríggjadag 26. februar
Nón 26. februar 2021
120868
Nýggjastu sendingar í SV
Fríggjadag 26. februar
Lyst 39
120766
Hósdag 25. februar
Pólsk sending: Saman í frástøðu
120802
Mikudag 24. februar
Fiskivinnukjak í Klaksvík
120790
Týsdag 23. februar
Jørðin II (6:6) - Býir
120719