Kann henda at Bretland verður verandi í ES

Kann henda at Bretland verður verandi í ES
Atkvøður bretska parlamentið ímóti Brexit-avtaluni, er als ikki vist, at Bretland fer úr ES, sigur bretski handilsmálaráðharrin Liam Fox.
 
30.12.2018 - 14:43

Fellur uppskotið hjá Theresu May, forsætisráðharra, í Undirhúsinum, kann væl henda, at Bretland verður verandi í ES.

Tað sigur bretski handilsmálaráðharrin Liam Fox við blaðið "Sunday Times".

Liam Fox er fyri, at Bretland fer úr ES.

Hann tekur undir við forsætisráðharra sínum og uppskoti hennara um, hvussu Bretland skal fara úr ES, og sigur við blaðið, at tað fer at oyðileggja álitið millum veljarar og politikarar, um Parlamentið havnar uppskoti forsætisráðharrans.

Avtalan verður ikki broytt

Uppskotið hjá Teresu May um, hvussu Bretland skal fara úr ES er úrslit av drúgvum samráðingum við ES, og í Brússel verður sagt, at avtalan partanna millum kann ikki broytast.

Atkvøðugreiðsla um uppskotið verður í Undirhúsinum umleið 20. januar, og ætlanin er, at Bretland skal fara úr ES 29. mars.

- Verður uppskotið felt, hava vit svikið álit veljaranna, sum atkvøddu fyri, at Bretland skuldi fara úr ES, sigur Liam Fox. Og tá er eins góður møguleiki fyri, at Bretland verður verandi í ES, sum at farið verður úr evropeiska samveldinum, sigur handilsmálaráðharrin.

Liberal-demokratarnir í bretska undirhúsinum eru ímóti, at Bretland fer úr ES, og flokkurin vil hava, at uppskotið um at fara úr ES eisini fer til fólkaatkvøðu.

Layla Moran hjá liberal-demokratunum sigur um Liam Fox og tað, hann sigur, at Parlamentið svíkur álit veljaranna, at tað er Konservativi flokkurin hjá Theresu May og Liam Fox, ið svíkja, tí tey vilja ikki leggja úrslitið av samráðingunum við ES fyyri veljararnar at taka støðu til á nýggjari fólkaatkvøðu.


----------
 

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585