Skipanaruppskot er á veg

Fyri 85 milliónir krónur fæst eitt barnaheim í Hoyvík. Tað sigur leiðarin á byggideildini hjá Landsverki, Jón O. Sólsker. Og skipanaruppskotið um barnaheimið er á veg.

Fíggjarnevndin hjá Løgtinginum bíðar eftir skipanaruppskotinum, sum er næsta stigið eftir byggiskránna. Byggiskráin varð latin Løgtinginum saman við lógaruppskotinum 20. september í fjør.

Bárður Nielsen, formaður í Fíggjarnevndini, sigur, at einki skipanaruppskot er komið, hóast bæði Landsgrannskoðanin og fíggjarnevndin eru samd um, at skipanaruppskot skal verða gjørt, áðrenn uppskot verða latin Løgtinginum.

 >> SÍ EISINI Ætlanin at byggja nýtt barnaheim komin í drag

Tað verður gjørt í framtíðini, sigur Jón O. Sólsker. Annars fekk Fíggjarnevndin fyri stuttum at vita, at barnaheimið verður 20 milliónir krónur dýrari enn fyrst varð mett. Tað fer at kosta 85 milliónir kr., og ikki 65 milliónir.

Eyðgunn Samuelsen, landsstýriskvinna, sigur, at sambært Landsverki er orsøkin til hækkingina fyrst og fremst, at fermetraprísurin er hækkaður, at talið á neyðugum fermetrum er vaksið, og prísurin fyri lendið, sum skal keypast frá Tórshavnar kommunu, er eisini hækkaður.

Tórshavnar kommuna selur lendið í Hoyvík fyri 156 krónur fermeturin, sum er prísurin, kommunan selur slíkt lendi fyri.