Eingin hvalur skotin í ár

Íslendingar fara ikki at skjóta stórhval í summar.

Nú marknaðurin svíkur, og tað er trupult at sleppa av við hvalakjøtið, hava íslendsku hvalabátarnir sagt frá sær rættin at skjóta hval í ár - fyri fyrstu ferð síðan 2003.

Hetta verður sostatt fyrsta hvalaleysa íslendska summarið í 17 ár, skrivar RÚV á heimasíðuni.

Hetta er ikki bara galdandi fyri nebbafiskin, men eisini fyri sildrekan, sum finst í stórum nøgdum.

Innflyta til sølu í Íslandi

Hvalur hf., sum er síðsta felagið, ið veiðir nebbafisk, hevur longu boðað frá fyrr í hesum mánaðinum, at tey fara ikki at veiða nebbafisk í ár, tí loyvi fekst ov seint.

Gunnar Bergmann Jónsson, sum er stjóri í hvalaveiðifelagnum IP Útgerð, sigur, at felagið fer at leggja seg eftir øðrum fiski, men at tey kortini fara at innflyta sildreka úr Noregi fyri at nøkta lítla tørvin, sum er eftir honum í Íslandi. Hann væntar tó, at veiðan eftir sildreka heldur fram næsta ár, á vári í 2020.

Íslendingar fóru í 2003 at veiða hval til vísindalig endamál. Í 2006 tóku teir vísindaliga kravið burtur og loyvdu veiðu við handilsligum endamáli. 

Síðan hevur altjóða trýst saman við minkandi eftirspurningi bæði í Íslandi og uttanlands gjørt, at lítið fæst burtur úr hvalaveiðuni í Íslandi.

Havrannróknarstovan hevur annars givið loyvi til at veiða 209 nebbafiskar og 217 sildrekar um árið fram til 2025. Men í ár verður so eingin hvalur skotin.