Ferðavinnan dálkar umhvørvið í Barcelona

06.07.2019 - 17:01
AktueltÚtheimurin
Ferðavinnan dálkar umhvørvið í Barcelona
Borgarstjórin sigur, at býurin hvørki fer at víðka havnalagið ella flogvøllin fyri at taka ímóti fleiri ferðafólkum.
Barcelona
Mynd: © savnsmynd  
 

Í Barcelona ætlar borgastjórin at avmarka talið av ferðaskipum, sum legga at í býnum, og at forða fyri at flogvøllurin verður útbygdur.

Plássið, vit hava til endamálið, er ikki óavmarkað, sigur Ada Colau, borgarstjóri.

Luftdálkingin avmarkast

Endamálið er at avmarka luftdálkingina, sum mangan er størri enn markið, Heimsheilsustovnurin, WHO, mælir til at halda seg innanfyri.

Barcelona er millum best umtóktu ferðamálini í Evropa, samstundis sum ein kanning vísir, at borgararnir í býnum halda, at ferðavinnan er størsti trupulleikin.

Tann næststørsti er tørvurin á bústøðum, sigur kanningin, og sambandið við fyrra trupulleikan er greiður, tí tað eru ferðafólkini og gistingar teirra, sum leggja hald á flestu bústaðirnar.

Umhvørvislig undantaksstøða

Mikudagin fer býarstýrið at lýsa Barelona í umhvøvisliga undantaksstøðu og áleggja tiltøk, sum hava til endamáls at minka um luftdálkingina.

Millum annað fara teir mest dálkandi bilarnir at fáa forboð fyri at koma inn í miðbýin, og teir skulu í staðin brúka ringvegirnar uttanfyri.

Grannaløg og umhvørvisbólkar hava í áravís stríðst fyri at avmarka talið á ferðamannaskipum, sum koma til Barcelona. Í fjør komu 2,5 milliónir ferðafólk í land har.

Avmarkaðar møguleikar

Barcelona er tann býurin í Evropa, sum flest ferðamannaskip vitja, og luftdálkingin er samstundis tann ringasta.

Tey, sum finnast at stóra streyminum, sum kemur í land av ferðamannaskipunum siga, at hesi ferðafólk - hvør sær - einans brúka góðar 400 krónur, meðan tey eru í landi, men eru til stóran ampa, tí tey leggjast aftrat øllum hinum ferðafólkunum, sum troka seg fram ígjøgnum gøturnar í Barcelona.

Hóast borgarstjórin sigur seg vilja gera nakað við støðuna, eru møguleikar hennara avmarkaðir, tí býarstýrið ræður hvørki yvir havnini ella flogvøllinum í Barcelona.

 
Nýggjastu sendingar í ÚV
Sunnudag 20. september
Guðstænasta í Vesturkirkjuni
113675
Sunnudag 20. september
Oddvá Nattestad er gestur í Brunsj
113670
Sunnudag 20. september
"Á jólum vóru vit sorgleys".
113610
Leygardag 19. september
Jambalaja 190920
113661
Leygardag 19. september
Morgunlestur leygardagur 19. september 2020
113244
Nýggjastu sendingar í SV
Mánadag 14. september
3-2
113470
Sunnudag 13. september
Andakt við Hallgerð Akurstein
113407
Sunnudag 13. september
Guðstænasta úr Gøtu kirkju
113403
Mánadag 7. september
3-2
113184
Mánadag 7. september
3-2
113186