- Tíðindi, mentan og ítróttur
Eldur í húsum í Hoyvík
Løgreglan fekk í nátt fráboðan um eld í einum húsum í Hoyvík. Stutt fyri klokkan eitt fór roykávararin at ýla, ringt varð til løgregluna, sum sendi boð eftir sløkkiliðnum.
Tað vísti seg, at tey, sum búðu í húsunum, høvdu smurt eina trappu við olju og høvdu koyrt brúktu klútarnar í rusk uttanfyri.
Men, sambært løgregluni, kunnu klútar sum hesir vera vandamiklir og kynda eld av sær sjálvum, serliga um teir liggja saman - og tað var júst tað, sum hendi í Hoyvík í nátt.
Nakað av roykskaða
Eldurin breiddi seg nakað upp eftir húsavegginum, men talan gjørdist ongantíð um nakran stóran skaða verður sagt av løgreglustøðini.
Tó var nakað av roykskaða og tey, sum búðu í húsunum, máttu leita sær ból aðrastaðni í nátt.
Hyggjuráðini, tá tú fæst við olju og klútar av hesum slagnum er at skola teir væl, ikki at leggja teir saman við øðrum tilfari og goyma teir burtur í einum jarn- ella glasílati, har luft ikki sleppur til.