- Tíðindi, mentan og ítróttur
Tvíheldur um Brexit-ætlanir
Bretski forsætisráðharrin, Boris Johnson, tvíheldur um, at Bretland fer úr ES 31. oktober, sama um ein avtala fæst í lag ella ikki
Tað gjørdi Boris Johnson greitt, tá hann helt røðu á landsfundinum í konservativa flokkinum í Manchester.
Forsætisráðharrin sigur, at stjórnin fer at kunngera eina nýggja ætlan um Brexit, men hann ger samstundis greitt, at ongar ætlanir eru um at biðja ES leingja freistina fyri Brexit.
>> SÍ EISINI Johnson avdúkar skjótt Brexit-ætlan
– Vit fara at arbeiða fyri at fáa eina avtalu í lag við vinir okkara í ES, men sama hvat úrslitið verður, fara vit úr samveldinum seinast í hesum mánaðinum, segði Boris Johnson.
Uppskotið um avtalu er endaliga tilboðið til ES, sigur forsætisráðharrin.
Stjórnin hevur upplýst, at uppskotið verður sent til Brússel beint eftir, at Boris Johnson hevur hildið røðu sína á landsfundinum hjá konservativa flokkinum.