Meiri toskur og minni svartkalvi í Grønlandi

Meiri toskur og minni svartkalvi í Grønlandi
Føroyar og Grønland hava gjørt avtalu um fiskiveiðirættindi í 2020
Føroyingar fáa meiri tosk, men minni svartkalva í grønlendskum sjógvi
 
30.11.2019 - 11:34

Føroyar fáa meiri tosk í Eysturgrønlandi næsta ár. Føroyar og Grønland gjørdu í gjár avtalu um fiskiveiðirættindi í 2020.

Avtalan sigur, at føroyska toskakvotan í grønlendskum sjógvi verður 175 tons størri enn í ár. Føroysk skip hava loyvi til at fiska 1.500 tons av toski og 475 tons av brosmu í grønlendskum sjógvi. 

Svartkalvakvotan er tó minkað. Hon verður 225 tons næsta ár. Í ár er hon 325 tons. Vísindaliga tilmælið er, at svartkalvakvotan við Eysturgrønland eigur at minka.

Svartkalvakvotan við Vesturgrønland verður tó 100 tons eins og hon er í ár. Føroyar varðveita royndarkvotuna eftir krabba við Eysturgrønland, hon er 500 tons.

Grønlendsk skip í føroyskum sjógvi

Grønlendska svartkjaftskvotan í føroyskum sjógvi verður óbroytt, 13.500 tons. Grønland fær harumframt, eins og í ár, loyvi at fiska svartkjaftskvotuna, sum Grønland fær frá NEAF-C, í føroyskum sjógvi. 

Hetta eru 6.290 tons í 2020 - góð 100 tons meira enn í 2019. Grønlendsk skip sleppa eisini at fiska 3.200 tons av norðhavssild í føroyskum sjógvi næsta ár, tað sama sum í ár.

Samráðingarnar millum Føroyar og Grønland vóru í Keypmannahavn í gjár og hósdagin.

Í desember verða samráðingar við Russland, ES og Noreg um fiskiveiðurættindi. Tær eru allar í Føroyum. Tær fyrstu verða 5. og 6.desember. Tær verða við Russland.

9. og 10.desember verða samráðingar við ES og 17. og 18. desember við Noreg. Fiskimálaráðið skal eisini áseta føroysku kvoturnar av norðhavssild og svartkjafti í 2020 fyri nýggjár.

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585
Mikudag 27. mars
Frætt og fregnað 1 (3:3)
172858