Ársins fyrsti tingfundur í dag

Ársins fyrsti tingfundur í dag
Tingið fer m.a. at viðgera eitt uppskot um at stovna partafelag at gera undirsjóvartunnil til Suðuroyar
Tingfundir verða í dag og í morgin, og fleiri nevndarfundir eru eisini á skránni
Mynd: Bjarni Árting Rubeksen  
 
22.01.2020 - 09:25

Ársins fyrsti tingfundur verður í dag.

Millum málini, sum tingið fer at viðgera í dag, eru uppskotið til samtyktar hjá Javnaðarflokkinum um at stovna partafelag at gera undirsjóvartunnil til Suðuroyar, og uppskotið hjá landsstýrinum um at broyta skattalógina til frama fyri heimavirki.

Tingfundur verður eisini í morgin.

Tá fer tingið at viðgera uppskotið um útbyggingina á Landssjúkrahúsinum og uppskotið um at verja persónsupplýsingar, tað er uppskotið um nýggja dátuverndarlóg. 

Tingfundirnir byrja klokkan 11.

Nevndarfundir

Nakrar tingnevndir hava eisini fundir í dag, í morgin og fríggjadagin.

Fíggjarnevndin fer í dag og í morgin at viðgera uppskotið hjá løgtingsgrannskoðarunum til samtyktar um at góðkenna landsroknskapin fyri 2018.

Løgtingsgrannskoðararnir hava nógvar viðmerkingar, átalur og áheitanir á landsstýrið um at fáa ymisk viðurskifti í rættlag.

Løgtingsgrannskoðararnir siga bart út, at landsroknskapurin er ikki fullfíggjaður.

Millum annað eru tølini í nógvum almennum roknskapum ikki í samsvari við landsroknskapin, siga løgtingsgrannskoðararnir. 

Formansskapurin hjá løgtinginum hevur fund í dag. Hann skal millum annað endurskoða reglugerðina um floksstuðulin.

Rættarnevndin hevur fund í morgin at viðgera uppskotið um náttúrumargfeldislóg.

Tá koma landsstýrismaðurin í umhvørvis- og vinnumálum, Búnaðarstovan og Umhvørvisstovan á nevndarfundin.

Freistin longd  

Rættarnevndin hevur biðið um - og fingið - freist til 1.februar at koma við áliti um uppskotið um náttúrumargfeldislógina.

Fyrsta viðgerð var í tinginum 11.november í fjør, og tí skuldi álitið verið komið fyri jól.

Men Rættarnevndin bað løgtingsformannin um betri stundir at viðgera málið, og tað fekk hon.

Er kopiera
Nýggjastu sendingar í ÚV
Nýggjastu sendingar í SV
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Týsdag 26. mars
Veðrið
172832
Mánadag 25. mars
Beautyvarpið við Tanju
172718