- Tíðindi, mentan og ítróttur
Níggju flokkar manna ungdómstingið
Undirtøkan til ungdómstingið, sum verður um eina viku, hevur ikki verið størri enn hesaferð.
Níggju skúlaflokkar hava boðað frá, at teir verða við.
Ungdómstingið verður mánadagin og týsdagin í næstu viku.
Næmingar í 8.flokki, 9.flokki ella 10.flokki eru bodnir at manna ungdómstingið.
Ungdómsting skuldi vera í 2018, men tað varð av ongum, tí ov fáar tilmeldingar vóru.
Seks ungdómsting hava verið. Seinast var í 2016. Tá vóru seks skúlaflokkar við.
Viðgjørdu 12 uppskot
Tey 32 ungdómstingfólkini viðgjørdu tá 12 lógaruppskot, átta uppskot vórðu samtykt og fýra feld.
Endamálið við ungdómstinginum er at geva næmingum størri innlit í fólkaræði, at lata teir vera ein virknari part av fólkaræðinum, og geva teimum innlit í, hvør luturin hjá løgtinginum er í fólkaræðinum.
Løgtingsformaðurin setir ungdómstingið mánadagin í næstu viku klokkan tíggju.
Ungu politikarnir sleppa eisini at seta løgmanni og landsstýrisfólkunum ófráboðaðar spurningar.