Trump: Deyðatalið størst um tvær vikur

Dagliga deyðatalið í USA orsakað av koronavirusinum verður hægst um tvær vikur. Tað segði Donald Trump á tíðindafundi í gjárkvøldið, sambært tíðindastovuni, AFP, har forsetin kunnaði um støðuna viðvíkjandi korona. 

Sambært lærda háskúlanum, John Hopkins, doyðu 518 fólk av koronavirusinum í USA seinasta samdøgrið.

Tað er størsta talið í USA higartil. Tilsamans eru 2.409 fólk deyð av virusinum og yvir 136.000 eru smittað, skrivar DR. 

Tiltøkini longd til 30. apríl

Donald Trump segði, at tiltøkini, sum eru sett í verk fyri at tálma koronasmittuni, verða longd til 30. apríl. Hann hevur fyrr sagt, at tey skuldu steðgast á páskum.

 – Um vit halda deyðatalinum onkrastaðni millum 100 og 200.000, hava vit gjørt eitt gott arbeiði, segði Donald Trump sambært tíðindastovuni Reuters.

Amerikanska heilsumálaráðið sigur, at næstan 900.000 fólk í landinum eru kannað higartil.