- Tíðindi, mentan og ítróttur
Íslendsku kvoturnar hækka
Íslendska fiskimálaráðið sigur, at tað royndi at fáa gongd á samráðingar við hini strandalondini um svartkjaft, sild og makrel, men tað var til fánýtis, sigur ráðið.
Kristján Þór Júlíusson, fiskimálaráðharri, segði í februar, at av tí at Ísland ikki sleppur við í makrelsemjuna millum Føroyar, ES og Noreg, fór hann kanska at endurskoða svartkjaftskvotuna og sildakvotuna. Tað hevur hann nú gjørt.
Hann segði tá í februar, at Ísland ásetti sær minni svartkjaftskvotu og sildarkvotu í ár enn undanfarin ár fyri at vísa hinum strandarlondunum, at Ísland vil verja uppsjóvarfiskin og fáa í lag semju um hann.
Íslendska makrelkvotan í ár er 152.000 tons. Hon var 140.000 tons í fjør. Ísland ásetur kvoturnar av uppsjóvarkvoturnar fyrr enn vanligt í ár, partvíst fyri at hjálpa fiskivinnuni móti korona.