Mánadagin verður latið upp fyri ferðafólki

10.06.2020 - 11:35
AktueltHeilsa
Mánadagin verður latið upp fyri ferðafólki
Ferðafólk úr Danmark, Grønlandi, Íslandi, Noregi og Týsklandi skulu vísa váttan um negativa COVID-19-kanning, sum ikki er eldri enn fimm dagar
Ferðafólk skulu vísa negativa koronuváttan, sum ikki er eldri enn fimm dagar
 

Mánadagin 15. juni verður latið upp fyri ferðafólki úr Danmark, Grønlandi, Íslandi, Noregi og Týsklandi. Ferðing úr øðrum pørtum av heiminum er enn avmarkað til føroyingar, sum koma heim, og fólk, ið hava arbeiðsørindi í Føroyum.

Landsstýrið mælir føroyingum til fyribils ikki at ferðast í onnur lond enn tey fimm londini, ið latið verður upp fyri tann 15. juni.

Ferðafólk, sum koma úr Danmark, Grønlandi, Íslandi, Noregi og Týsklandi, skulu vísa váttan um negativa COVID-19-kanning, sum ikki er eldri enn fimm dagar. Kravt verður ikki, at fólk, búsett í Føroyum, skulu vísa váttan, tá ið tey koma aftur til landið.

Tað er sera umráðandi, at øll ferðandi til Føroya vísa varsemi á ferðini, og at tey ferðandi, sum nýliga eru komin til landið, eru serliga ansin og fylgja almennu tilmælunum, sigur løgmansskrivstovan í tíðindaskrivi.

Broytt sóttarhald

Kravið um sóttarhald verður sett úr gildi fyri ferðandi úr Danmark, Grønlandi, Íslandi, Noregi og Týsklandi. Kemur tú úr øðrum londum enn hesum, verður tó framvegis staðiliga mælt til, at tú fert í sóttarhald í 14 dagar.

Tað er sera týdningarmikið, at øll, sum hava verið uttanlands, lata seg kanna beinanvegin, um illgruni er um smittu, sigur landsstýrið.

Kanningardepil

Landsstýrið ætlar at gera tað lættari hjá hvørjum einstøkum at lata seg kanna. Tí verður í løtuni arbeitt við at skipa ein kanningardepil afturat.

Tað verður koronaráðgevingin, sum fer at skipa nýggja kanningardepilin.

Sjúk og eldri

Landsstýrið sigur, at tað er sera týdningarmikið, at ein verjugarður verður gjørdur um okkara sjúku, eldru og veiku borgarar, tá ið ræður um COVID-19. Heilsuverkið og ávís eldraøki í landinum hava sum er skipanir, har starvsfólkini lættari kunnu lata seg kanna. Arbeitt verður við at víðka hesa skipan til aðrar viðkomandi starvsbólkar, ið eru um sjúk, eldri og veik.

Serskipan til útisiglarar

Umleið 100 útisiglarar koma til Føroya um vikuna. Ein serstøk skipan fyri útisiglarar verður nú sett í verk. Aðalmálið við skipanini er at gera tað lættari hjá útisiglararum at lata seg kanna fyri COVID-19, tá ið teir eru í Føroyum. Við nýggju skipanini slepst undan sóttarhaldinum.   

Landsstýrið fylgir støðugt gongdini, og er neyðugt at endurskoða galdandi skipanir, verður hetta gjørt, sigur løgmansskrivstovan í tíðindaskrivinum.

 
Nýggjastu sendingar í ÚV
Mánadag 13. juli
Góðan morgun Føroyar 13.07.2020
111313
Sunnudag 12. juli
Frá stríðsárunum (2:15)
110842
Sunnudag 12. juli
Etos: Hví skulu vit hava etikk?
110676
Sunnudag 12. juli
Guðstænasta í Kollafjarðar kirkju
111294
Nýggjastu sendingar í SV
Leygardag 11. juli
Video: 5mf dreingir, Fjarðastevna 2020
111287
Leygardag 11. juli
Video: 5mf kvinnur, Fjarðastevna 2020
111285
Leygardag 11. juli
Video: 10mf, Fjarðastevna 2020
111283
Leygardag 11. juli
Video: 8mf, Fjarðastevna 2020
111281