Pensjonistar fáa nú eisini lønarískoyti

12.06.2020 - 08:22
AktueltPengar
Pensjonistar fáa nú eisini lønarískoyti
Fólk, sum eru 67 ár ella eldri og sjálvstøðug vinnurekandi, fáa nú eisini pening úr ískoytisskipanini hjá ALS
 

Tað stendur í broyttu lógini um lønarískoyti av koronasjúkuni, sum Elsebeth Mercedis Gunnleygsdóttur, landsstýriskvinna, hevur lagt fyri løgtingið.

Løgtingslógin um lønarískoyti er nú eisini galdandi fyri fólk á privata arbeiðsmarknaðinum, yvir 67 ár, sum privatur arbeiðsgevari hevur sent til hús av koronusjúkuni, og fyri sjálvstøðug vinnurekandi, sum ikki fáa rikið sítt virksemi til fulnar av teimum tiltøkum, sum eru sett í verk.

Men tey verða mótroknað í aðrari inntøku, sum tey hava skyldu at upplýsa um, stendur eisini í uppskotinum. Lønarískoytið kann verða skert, um inntøkan fer upp um 17.000 krónur, um mánaðin.

Hámarkið er 27.000 krónur

Fyri hvørja krónu, sum samlaða upphæddin fer upp um 17.000 krónur, um mánaðin, verður lønarískoytið skert við eini helvt.

Fer inntøkan upp um 27.000 krónur, fellur alt lønarískoytið burtur. Til ber eisini at tekna eina sjálvbodna trygging, fyri at tryggja lønarmissin. Tað kostar 3.000 krónur.

Fólk yvir 67 ár koma undir vanligu pensjónina, og tí fáa tey helvtina av vanligu tímalønini, ella 57,69 krónur um tíman, fyri 40 tímar um vikuna. Men kann ikki vera hægri enn skattskylduga inntøkan.

Fáa nú umleið tað sama

Skattskylduga inntøkan fevnir ikki um sosialar pensjónir og arbeiðsmarknaðareftirløn, eftir almannapensjónslógini.

Í viðmerkingunum verður sagt, at lógaruppskotið fer at hava við sær, at sjálvstøðugir vinnurekandi fólkapensjonistar, sum missa inntøku av COVID-19, fara at hava eina tøka inntøku, sum umleið er á hædd við tað, sum fólkapensjonistar, sum onga aðra inntøku hava, fáa.

Ein fólkapensjonistur, sum fær lønarískoyti uppá 57,69 krónur um tíman í ein mánað, fær umleið 9.000-10.000 krónur um mánaðin, stendur í uppskotinum. Uppskotið fær fyrstu viðgerð í løgtinginum í dag.

 
Nýggjastu sendingar í ÚV
Fríggjadag 14. august
Góðan morgun Føroyar 14.08.2020
112317
Fríggjadag 14. august
Morgunlesturin fríggjamorgunin 14. august 2020
112097
Hósdag 13. august
Summartímin hósdagin 13. august
112292
Hósdag 13. august
Góðan morgun Føroyar 13.08.2020
112276
Nýggjastu sendingar í SV
Mikudag 12. august
Drúgt sjónvarp: Saksun - Tjørnuvík
112264
Mikudag 5. august
Tíðindafundur og Dagur og vika
111992
Hósdag 30. juli
Midnáttarsangur
111814
Mikudag 29. juli
Upp á gólv
111810
Mikudag 29. juli
Á ólavsøku 2:2
111809