- Tíðindi, mentan og ítróttur
Kommunistaflokkurin í Kuba nýggjan leiðara
60 ára gamli, Miguel Díaz-Canel, er nýggjur leiðari fyri kubanska kommunistaflokkin.
Tað skrivar bretska tíðindastovan, BBC.
Hann tekur við eftir Raúl Castro, sum legði frá sær um vikuskiftið.
Raúl Castro hevur stjórnað kubanska kommunistaflokkin síðan 2011, tá ið hann tók við eftir bróðurin, Fidel Castro.
Castro-tíðarskeiðið av
Hetta er fyrstu ferð síðan kommunistisku kollveltingina í 1959, at Kuba verður stýrt av onkrum øðrum enn einum av Castro-brøðunum, Fidel og Raúl Castro.
Miguel Díaz-Canel hevur verið forseti í Kuba síðan 2018, og var av teimum flestu frammanundan mettur at hava bestan møguleika at taka við hægsta embætinum í kommunistaflokkinum.
Eygleiðarar staðfesta eisini, at valið av Miguel Díaz-Canel er eitt framhald av politisku og búskaparligu kósini hjá Castro-brøðurnum.
Hann byrjaði sína politisku yrkisleið í staðbundna ungmannafelagnum hjá kommunistaflokkinum í Santa Clara, og arbeiddi seg upp gjøgnum skipanina.
Í 2009 varð hann settur sum ráðharri fyri hægri útbúgvingar, og níggju ár seinni bleiv hann valdur til forseta.