Vil hava málið viðgjørt av nýggjum

Løgreglumaðurin, Derek Chauvin, sum í apríl varð dømdur fyri at drepa George Floyd, vil hava, at rættarmálið verður tikið upp av nýggjum.

Chauvin, sum varð fangaður á einari videoupptøku, varð dømdur fyri morðið, tá hann sat oman á Floyd í níggju minuttir.

Fjølmiðlar í USA siga, at tað er ikki óvæntað, at løgreglumaðurin fór at biðja um, at rættarmálið gongur umaftur.

Prógvini tyngjandi

The New York Times endurgevur serfrøðingar, ið siga, at málið neyvan gongur umaftur, tí prógvini í málinum eru so tyngjandi.

Tað tók nevningunum, sum feldu dóm í málinum, minni enn eitt samdøgur at koma til niðurstøðuna, at Derek Chauvin var sekur.

Rættarmálið vardi í tríggjar vikur, og 45 vitni vórðu avhoyrd. 16. juni verður greitt, hvørja revsing Derek Chauvin skal hava.