10 ár síðani Utøya

Í dag fara kirkjuklokkurnar um alt Noreg at sláa 77 sløg til minnist um tey 77 fólkini, sum fyri tíggju árum síðani lótu lív í stórsta yvirgangsálopinum í Noregi síðani seinna heimsbardaga.

Tað var seinnapartin fríggjadagin tann 22. juli í 2011 beint fyri klokkan hálvgum fýra, at tann høgravíðgongdi Anders Behring Breivik fyrst sprongdi ein vørubil í luftina uttan fyri stjórnarbygningarnar í Olso.

Skaðin var stórur. Átta fólk lótu lív á staðnum, og 10 fólk vórðu innløgd á sjúkrahús álvarsliga løstað, og 30 onnur fingu skaða.

Skeyt frá hond á Utøya

Tveir tímar seinni var sami maður farin at skjóta frá hond á lítlu oynni Utøya, har ungmannafelagsskapurin hjá norska arbeiðaraflokkinum helt árligu summarleguna.

Breivik hevði latið seg í sum løgreglumann og segði seg vera komnan at standa fyri trygdini eftir bumbuálopið í Oslo.

Skjótt eftir, at hann var komin í land, fór hann undir væl tilrættislagdu ætlan sína, um at drepa frá hond. Hann drap 69 fólk á Utøya og særdi fleiri enn 30.

Breivik varð seinni dømdur 21 ár í varðhald fyri brotsgerðina.