Meg minnist: Jón og Valborg Rasmussen (2:2)

29-01-2018

Jógvan Arge hittir Jón og Valborg Rasmussen úr Klaksvík og Vági, sum hava arbeitt í Grønlandi sum kommunuverkfrøðingur og fólkaskúlalærari.

Tað var ein avbjóðing hjá Valborg at taka lærarastarv upp á seg í Eysturgrønlandi. Einir 400 næmingar vóru á skúlanum í Tasilak, og har vóru lærarar úr Danmark, Vesturgrønlandi og Eysturgrønlandi. Í Nanortalik og Manitsok, seinnu ár teirra í Grønlandi, fækkaðu donsku lærararnir, og tá Valborg gavst í Manitsok, var hon tann seinasti ikki-grønlendingurin, sum fór. Hjúnini góvust í Grønlandi og fluttu til Danmarkar, har tey hava bústað í Næstved. Valborg mælir lærarum, sum ætla sær til Grønlands, til at fara til Eysturgrønlands. Har er móttøkan best.

Meg minnist

Sendirøðin Meg minnist byrjaði í 2009. Í røðini leggur Jógvan Arge dent á at fáa fólk at siga frá slíkum, sum tey vita og hava upplivað. Sjálvt heitið á sendirøðini er ikki nýtt. Niels Juel Arge brúkti navnið í mong ár til sínar samrøðusendingar, og Jógvan ásannar, at ringt er at finna eitt betri felagsheiti fyri slíkar sendingar.