- Tíðindi, mentan og ítróttur
Koronaútgerð dýrkar um allan heimin
Betri Stuðulsgrunnurin veitir nú 10 milliónir í bráðfeingishjálp til føroyska sjúkrahúsverkið. Koronasmittan er størsta heilsuliga avbjóðing, sum Føroyar hava staðið yvir fyri í nýggjari tíð, og tí var grunnurin ikki í iva um at stuðla hesum týðandi arbeiði, skrivar Betri Samtakið í einum tíðindaskrivi í dag.
Á Landssjúkrahúsinum merkja tey, at útgerðin til at basa koronasmittuni dýrkar meir og meir. Tí fegnast sjúkrahússtjórin um peningagávuna, ið fer óskerd til koronatilbúgvingina í Føroyum.
"Hetta ger sera stóran mun hjá okkum, tí kostnaðurin av júst hesi útgerð er vaksin sera nógv, nú eftirspurningurin er vaksin so brádliga um allan heim. Vit eru sera takksom. Eg havi verið í sambandi við landsstýrismannin við heilsumálum, sum eisini vil senda eina hjartans tøkk," sigur Steinar Eirikstoft, forstjóri fyri sjúkrahúsverkið.