- Tíðindi, mentan og ítróttur
Óvissa um stjórarstarv hjá høvuðsstaðnum
Tað er ikki vist, at starvið sum tekniskur stjóri hjá Tórshavnar kommunu verður lýst leyst, nú Jákup Egholm Hansen, sum var tekniskur stjóri í knappliga átta ár, gavst týsdagin.
Møguliga verða onkrar bygnaðarbroytingar gjørdar í ovastu leiðsluni hjá høvuðstaðarkommununi.
Tá Heðin Mortensen, borgarstjóri, í gjár, varð spurdur, um kommunan nú fer at lýsa eftir tekniskum stjóra, var svarið hvørki ja ella nei.
Jákup Egholm Hansen gjørdist nevndarlimur á eykaaðalfundi í Eik Banka 10.juni í ár.
Kommunan gav honum valið millum stjórastarvið og nevndarsessin. Jákup Egholm Hansen vildi ikki fara úr nevndini í Eik, tí noyddist hann týsdagin úr starvi sínum sum tekniskur stjóri hjá Tórshavnar kommunu.
Hann fær løn í sjey mánaðir frá kommununi.
Fyri ta fráfaringarlønina skal Jákup Egholm Hansen eisini vera til taks hjá kommununi í sjey mánaðir í sambandi við ítøkilig mál, sum hann hevur serligan kunnleika um, eitt nú ymsar byggiverkætlanir hjá kommununi.
Tak niður
Sí eisini