- Tíðindi, mentan og ítróttur
ES-marknaðurin opin aftur um tvær vikur
Um tvær vikur verður ES-boykottið móti Føroyum sett úr gild, væntar Kate Sanderson, sendikvinna í Brússel.
Seint seinnapartin í gjár samtykti ES-nevndin fyri fiskivinnu og aling at taka undir við uppskotinum hjá ES-nevndini um at strika handilsforðingarnar móti makreli og norðhavssild úr Føroyum.
Avgerðin er tó ikki endalig enn. Hon skal eisini formliga góðkennast í ES-nevndini.
Tað kann gerast við skrivligum samskifti millum ES-nevndarlimirnar.
Síðani fer reglugerðin um at taka av handilsforðingarnar í ES-kunngerðablaðið. Og hon kemur í gildi dagin eftir, at hon er kunngjørd. Kunngerðablaðið hjá ES kemur út hvønn dag frá týsdegi til leygardag.
Føroyska sendistovan í Brússel sigur, at roknað verður við, at reglugerðin kann verða kunngjørd longu í viku 33, sum byrjar 11.august. Tá kunnu boðini um, at ES ikki longur boykottar Føroyar, í fyrsta lagi koma í gildi mikudagin 13.august.
Bæði í Skotlandi og í Danmark heitti uppsjóvarvinnan staðiliga á ES-nevndina fyri fiskivinnu og aling um at fella uppskotið um at strika handilsforðingarnar, tí føroyingar, sambært vinnuni í Skotlandi og Danmark, framvegis fiska ov nógv og ikki burðardygt.
Nú handilsforðingarnar verða strikaðar, sleppa Føroyar báðum gerðarrættarmálunum móti Evropasamveldinum.
Tak niður