Búmerki kunnu líkjast í ávísan mun

Javnan hoyra vit um handlar, matstovur og virki trætast um, hvør var fyrstur við einum búmerki ella navni. Men Nær stjelur tú eitt búmerki, og kanst tú brúka eitt navn til títt virki, sum onkur annar brúkar frammanundan?

Jógvan Svabo Samuelsen er løgfrøðingur og hevur skrivað serritgerð um vørumerkjarætt.

Sambært honum eru fleiri faktorar galdandi, tá tosað verður um at herma eftir einum búmerki ella brúka sama navn, sum onkur annar longu brúkar.

- At fáa íblástur frá onkrum, sum longu er á marknaðinum, er loyvt. Tó er tað bara loyvt í ein ávísan mun, sigur Jógvan Svabo Samuelsen og leggur afturat:

- Orsøkin, til at til dømis tvær matstovur ikki skulu hava sama búmerki og navn, er, at tú sum kundi skalt kunna skyna á mun á matstovunum. Tað er serliga umráðandi, um matsotvurnar selja somu matvørur og harvið eru á sama marknaði, sigur Jógvan Svabo Samuelsen.

Hann sigur, at í Føroyum er tað ein sjáldsamur trupulleiki, at handlar, matstovur og virki beinleiðis herma eftir hvørjumøðrum.

- Sum oftast er tað soleiðis, at jú kendari tín fyritøka er, tess betur er hon somuleiðis vard, sigur Jógvan Svabo Samuelsen.