Ítróttur og kirkja kann saktans samantvinnast.

Tað heldur Bergur D. Joensen, prestur, og tí skipar hann fyri einí heilt serstakari gudstænastu í Argja kirkju í kvøld.

Talan er um eina sonevnda ítróttargudstænastu.

- Tað eru nógv fólk, ið fáast við ítrótt, og ítróttur er ein stórur partur av okkara mentan. Kirkjan hevur eisini við mentan at gera, og tí haldi eg, at ítróttur og kirkja saktans kunnu samantvinnast, sigur Bergur D. Joensen.

Sambært prestinum verður ítróttargudstænastan sum flestu aðrar gudstænastur, men dentur verður lagdur á, at ítróttarfólkini skulu merkja, at tey fáa eitt gott orð á vegnum - ítróttarvegnum.

Tónleikur fer at fylla ein stóran part av gudstænastuni, og í tí sambandi fer bólkurin Tollarar & Syndarar at syngja og spæla.