- Eg sá alt fyri eitt, at alt ikki var soleiðis, sum tað plagar, og tí spurdi eg dóttrina, um okkurt var galið. Tá fortelur hon so, hvat hon hevur upplivað.

Orðini eigur Lilian Hellisdal, sum býr í Kollafirði.

Leygarkvøldið hevði 10 ára gamla dótturin verið í barnaklubba, og á veg heim steðgar ein bilur henni.

- Hon fortaldi okkum, at í bilinum sat ein maður í sólbrillum og keppi og spurdi, um hann ikki skuldi koyra hana heim. Hon skuldi fáa bomm afturfyri, sigur Lilian Hellisdal.

Dótturin segði nei takk og skundaði sær heim.

- Tíbetur hendi einki, men vit eru sjálvandi kløkk um hendingina, sigur Lilian Hellisdal, sum alt fyri eitt skrivaði eina ávaring á Facebook, soleiðis at onnur foreldur í Kollafirði og har á leiðini vóru kunnað um barnalokkaran.

Málið er meldað til løgregluna.