- Tíðindi, mentan og ítróttur
Góðan morgun Føroyar
Nú skal tónleikur fylla meira í gerandisdegnum hjá børnunum og teimum ungu, sum búgva á Barnaheiminum í Havn.
Føroya Barnaheim ætlar nevniliga í næstum at fara undir eitt tónleikaátak.
- Vit vita, at tónleikur er nakað, sum stimbrar og mennir børn, og tí vilja vit gera meira burtur úr við at fáa tónleik inn í Barnaheimið, sigur Hildur Hermansen, sum er leiðari á Føroya Barnaheimi.
Finn Larsen er ein av teimum, sum skal standa á odda fyri tónleikaverkætlanini, sum tó ikki er heilt ítøkilig enn.
- Herfyri fingu vit royndir við sokallaðum musikkterapi, og aftan á tað hildu vit tað vera spell ikki at gera meir burtur úr tónleiki á Barnaheiminum, sigur Finn Larsen.
Men skal tónleikur gerast ein partur av gerandisdegnum hjá børnum og ungum á Føroya Barnaheimi, er neyðugt, at ymisk ljóðføri eru tøk. Tí skipar Johan Ásmundsson fyri stuðulstiltaki og konsert á Østrøm leygardagin. Pengarnir, sum koma inn skulu brúkast til at keypa ljóðføri fyri.
Lena Andersen, Jens Marni Hansen, Lea Kampmann og Kristina Bærendsen hava konsert á Østrøm leygarkvøldið klokkan 08.00.