Koltur hevur egnan vanga á Facebook, ið er at síggja her.

Har skrivar Bjørn Patursson soleiðis um hendingina:

- Tá eg var í haganum helt eg meg síggja eina ær sum hevði lembt trý. Men hon var so mikið langt burtur, at eg helt, at tað mátti helst vera ein steinur, sum lá tætt við, har hon hevði lembt. Men so við eitt sá eg tað týðiligari, jú mín sann ein trílemba! Tað er hent eina ferð fyrr, síðan vit komu higar í 1994. Tá ið eg var komin til hús, mátti eg niðan aftur at kanna málið, um tað veruliga var talan um trý lomb. Og eg gjørdist ikki sørt skakkur, tá eg varnaðist, at tað, sum eg hevði hildið vera okkurt svart, ein steinur ella tílíkt við kikaranum, var tvey lomb, sum lógu í trunka og vermdu hvørt annað.

Tá eg nærkaðist, skumpaði ærin undir lombini, og har stóðu ikki minni enn fýra lomb og vinglaðu á sekstan beinum.

Talan er um eina heilt vanliga hagaær, sum aldrin so mikið sum hevur luktað til hoyggj – enn minni kraftfóður, men hevur gingið úti í haganum alt sítt lív.

Spurningurin, um hon megnar at fáa lombini undan, er ein heilt annar, og tí ivist eg stórliga í.