- Tíðindi, mentan og ítróttur
Góðan morgun Føroyar
- Eg havi altíð ynskt at roynt hasa breytina, og tí meldaði eg meg til. Eg fekk so at vita, at í ár verður kappast í liðum, og tí var eg skjótur at fáa fatur á Biritu Poulsen og Øssuri Debes Eiriksfoss, sum alt fyri eitt vóru klár til at manna føroyska liðið.
Soleiðis sigur Janus Jakobsen, sum saman við Biritu Poulsen og Øssuri Debes Eiriksfoss skal royna seg á tí, sum fleiri vilja vera við, er heimsins torførasta forðabreyt.
Talan er um kendu sjónvarpskappingina, Ninja Warrior, sum í nøkur ár hevur verið at sæð á donsku sjónvarpsrásini, Kanal 5.
Upptøkurnar eru í nakrar dagar í juli, men enn hevur føroyska liðið ikki fingið so nógva kunning.
- Fríggjadagin fekk eg boð frá Kanal 5 um, at vit eru við, men annars vita vit ikki tað stóra um kappingina og upptøkurnar sum heild. Beint nú royna vit at venja og halda okkum í gongd soleiðis, at vit vera klár til kappingina, sigur Janus Jakobsen.