- Tíðindi, mentan og ítróttur
Góðan morgun Føroyar
- Sukur er hvørki vandamikið ella eitrandi, og eingin fær skaða av at eta eitt sindur av sukri av og á. Tað sigur Snorri Patursson, sum er kostfrøðingur.
Herfyri fortaldu vit í morgunsendingini um tær fleiri enn 500 kvinnurnar, sum hava hildið seg frá øllum sukri í fýra vikur, og nú mánaðurin er um at vera liðugur, siga tær seg hava upplivað fleiri fyrimunir við ikki at eta sukur.
- Sukur- og køkumentanin í Føroyum er sjúk, men tá tað er sagt, snýr tað seg um at finna gylta millumvegin. Sum heild er tað ikki heilsugott at eta nógv sukur hvønn dag, men alt við máta, sigur Snorri Patursson og heldur fram:
- Rørir tú teg og etur vanligan, góðan mat, ger tað einki, um tú etur eitt sindur av sukri hvønn dag. Tað, sum eg haldi er umráðandi at hugsa um, eru nøgdirnar og góðskan. Og tí haldi eg ikki, at tað er eitt gott hugskot at eta light-vørur ella sokallaðar sukurfríar vørur, tá tú vilt hugna tær og eta okkurt, sum smakkar søtt, sigur Snorri Patursson.