- Tíðindi, mentan og ítróttur
Góðan morgun Føroyar
Herfyri fortaldu vit um nýggju dilluna, har væl fleiri enn 500 kvinnur høvdu avgjørt ikki at eta nakað sukur allan mai mánað.
Mai er nú um av vera liðugur, men hvussu hevur gingist hesum kvinnunum ein heilan mánað við ongum sukri?
Ein fortaldi í morgunsendingini í morgun, hvussu hon hevur upplivað seinastu fýra vikurnar.
- Eg havi lagt merki til, at eg sovi betur, havi fingið penari húð, og so smakkar allur matur og eisini frukt betur, enn tað plagdi, sigur Sólja F. Jóanisdóttir.
Hon dylir tó ikki fyri, at hon fegnast um, at mánaðurin við ongum sukri er um at vera liðugur.
- Eg gleði meg til hetta er yvirstaðið, og tað verður deiligt at liva sum vanligt aftur. Eg haldi, at henda avbjóðingin hevur verið rættiliga strævin, eitt nú tá mann skal út til fólk, sigur Sólja F. Jóanisdóttir.