- Tíðindi, mentan og ítróttur
Góðan morgun Føroyar
Lions Club Tórshavn, sum kann halda 50 ára stovningardag í november mánaði, hevur vunnið rættin at lata ársins Lionsprís, sum er upp á til samans 400.000 krónur, ið koma Føroya Barnaheimi til góðar.
Lionsprísurin, sum varð stovnaður í 1988, verður latin einum einstaklingi, stovni ella líknandi sum stuðul til granskingar- ella menningararbeiði, ið kann betra um lívskorini hjá borgarum.
Tað verður Føroya Barnaheim, ið fær tær 400.000 krónurnar, sum Lionsprísurin er í ár, og í tí sambandi fara Mortan Poulsen, fráfarandi forseti í Lions Club Tórshavn, og Hildur Hermansen, leiðari á Føroya Barnaheimi, um eina góða viku til Danmarkar at taka ímóti Lionsprísinum.
Hetta hendir við stíli, tí tað verður hansara kongliga hátign, Heindrikkur prinsur, ið fer at handa prísin umborð á 'Dannebrog', sum tá liggur í Aarhus. Prinsurin er verji hjá Lions Club Danmark, og ein av uppgávunum er, at hann á hvørjum ári handar Lionsprísin.
Morgunsendingin tosar við Mortan Poulsen, fráfarandi forseta í Lions Club Tórshavn, og Hildur Hermansen, leiðara á Føroya Barnaheimi.