Tað serstaka við Trio Ovis er blandingin av træblásara og messingljóðførum. Við hesari nýggju samanseting ber til at finna fram til nýggj ljóð, og trioin arbeiðir við at finna síni egnu livandi ljómaløg. Áhoyrarin kann tí vænta at fáa eina heilt øðrvísi uppliving.

Trio Ovis byrjaði á Jyska Musikkonservatoriinum í Aarhus, tá íð tríggir tónleikarar vildu finna nýggjar leiðir í tí klassiska kamartónleikinum.

Trio Ovis er mannað við Kristina Thede Johansen, Hoyvík, saksofon, Mariu Wang Reinert, Kaldbak, trombon og Sofie Brems Sørensen, Viborg, trompet. Meginparturin av Trio Ovis er úr Føroyum (Kristina og Maria), og er tað tí einki løgið, at trioin hevur fingið navnið Trio Ovis. Ovis er latín og merkir seyður.

Í fjør varð Trio Ovis boðin at spæla áSummartónum 2016, og har hava tær tríggjar konsertir. Í sambandi við at Summartónar hava 25 ára hald í ár, varð avgjørt, at allar konsertir skuldu vera við føroyskum tónleiki. Til hesar konsertirnar hava tær fingið fýra tónaskøld at skriva nýggj stykki, og trý at útseta eldri verk hjá teimum til samansetingina.

Verk hjá Arnold Ludvig, Heðin Ziska Davidsen, Kim Kristensen og Sámal Jákup Jakobsen verða spæld fyrstu ferð. Harafturat verða útsetingarnar av verkum hjá Atla K. Petersen, Kára Bæk og Kristian Blak spæld fyrstu ferð.

Kirkjukonsertir:

Á kirkjukonsertunum er skráin ein onnur. Trio Ovis leggur dent á at spæla norðurlenskan tónleik. Skráin fevnir m.a. um verk hjá hjá Edvard Grieg, Carl Nielsen, H.J. Højgaard, O. Waagstein og Elini Brimheim Heinesen.

Av tí at samansetingin av ljóðførunum ikki er siðbundin hevur trioin sjálv útsett flestu stykkini til hesar konsertirnar.

Konsertirnar á Summartónum eru:

2. juli í Havnar kirkju kl. 11.30 (ókeypis)

3. juli í Hotel Skálavík kl. 19.30 (50 kr.)

4. juli á Steinprenti kl. 20.00 (50 kr.)

Kirkjukonsertirnar eru:

28. juni í Hoyvíkar kirkju kl. 19.30 (ókeypis)

29. juni í Kunoyar kirkju kl. 17.00 (ókeypis)

5. juli í Kaldbaks kirkju kl. 19.30 (ókeypis)