- Tíðindi, mentan og ítróttur
Góðan morgun Føroyar
Teir fyrstu 300 sendararnir í Norra eru longu sløktir. Nú skulu norskir útvarpslurtarar venja seg við at lurta á DAB+ útvørpum, á netinum ella á telefonini.
Lokalútvørpini hava kortini loyvi til at senda á FM í fimm ár aftrat.
Øll fegnast ikki um broytingina. Bilánarar gera vart við, at langt frá allir bilar hava DAB+-útgerð, og fleiri kæra seg um svikaligt signal nógva staðni í fjallalandinum.
Í Føroyum verður FM netið kortini ikki sløkt enn, sigur Bjarni Wilhelm, deildarstóri á stýrisdeildini á mentamálaráðnum, sum varðar av FM-netinum.
Eingin nágreinilig freist er sett á, nær farið verður frá FM í Føroyum, men 2024 kundi verið sannlíkt, heldur Bjarni Wilhelm, sum leggur aftrat, at tað er væl hugsandi, at vit í Føroyum leypa DAB+ tøknina um og bíða til tað verður gjørligt hjá øllum at stroyma útvarp.
Í Danmark skulu FM-sendararnir eisini beinast burtur, men tað hendir ikki fyrr enn helvtin lurtar eftir talgildum útvarpi. Í løtuni er talið 36 prosent, sambært seinastu kanning hjá DR medieforskning.