Eingin semja enn

Klokkan tvey seinnapartin í morgin er evsta mark at lata løgtingsumsitingini lógaruppskot, sum skulu viðgerast í hesari tingsetuni, og Høgni Hoydal hevur áður sagt, at hendan freistin verður hildin.

- Enn er eingin semja við Sambandsflokkin, men samráðingarnar halda fram, sigur Høgni Hoydal, landsstýrismaður.

Sambandsflokkurin fer á fund seinnapartin at umrøða fiskivinnunýskipanina. Bárður Nielsen sigur við útvarpið, at enn eru nøkur viðurskifti, sum semja ikki er um.

Skal semja finnast, krevur tað, at partarnir flyta seg nakað afturat, sigur formaðurin í Sambandsflokkinum, sum ikki hevur hug at viðmerkja, hvat hann væntar av samráðingunum, og um hansara flokkur tá avtornar ger semju við samgonguna.