- Tíðindi, mentan og ítróttur
Eingin semja um fiskivinnunýskipan
Samráðingarnar millum samgonguna og Sambandsflokkin um eina fiskivinnunýskipan hava ikki givið nakað úrslit, og landsstýrismaðurin ber einki uppskot í Løgtingið í dag.
Í staðin gevur Høgni Hoydal sær sjálvum og samgonguni freist til mánadagin at almannakunngera eitt uppskot um eina nýskipan, sum samgongan antin leggur fram einsamøll ella saman við Sambandsflokkinum.
- Eg má bara staðfesta, at samráðingarnar við Sambandsflokkin hava ikki borið á mál. Nakrir knútar hava verið ov stórir til at loysa, sigur Høgni Hoydal.
Hóast einki er komið burturúr samráðingunum millum samgonguna og Sambandsflokkin, so vil landsstýrismaðurin í fiskivinnumálum ikki siga, at samráðingarnar eru endaliga slitnaðar. Tað vilja næstu dagarnir vísa, sigur hann.
Um tað ikki eydnast landsstýrismanninum at fáa Sambandsflokkin aftur til samráðingarborðið, so vendir samgongan aftur til útgangsstøði og leggur sítt egna uppskot fram.
Høgni Hoydal hevur ikki avtalað nakran nýggjan fund um fiskivinnunýskipanina, hvørki við Sambandsflokkin ella nakran av hinum andstøðuflokkunum.
Áðrenn Sambandsflokkurin fór í realitetssamráðingar við samgonguna tryggjaði flokkurin sær neyðugu atkvøðurnar frá samgongutinglimum, soleiðis at flokkurin kann leggja sítt egna nýskipanaruppskot fyri Løgtingið, eisini eftir at freistin er farin.
Tak niður