Kannabis hjálpir verri enn so øllum, sum hava pínu

Medisinskt kannabis hevur ikki ta stóru og góðu ávirkanina, sum nógv halda, men kann bara  í summum førum nýtast fyri pínu og serliga fyri vambul hjá fólki, ið liggja at doyggja. 

Tað sigur nýggi pínulæknin, Johannes Theodor Høgagarð. 

Hann hevur í nógv ár starvast á bæði Ríkissjúkrahúsinum og á privathospitalinum Hamlet, og hevur nýtt kannabis í viðgerðini. Royndirnar vísa, at tað bara riggar hjá nøkrum fólkum. 

Eingin verið í Føroyum

Bara yvirlæknar kunnu útskriva medisinskt kannabis.

Higartil hevur eingin lækni við sergrein í pínuviðgerð verið í Føroyum, og medisinskt kannabis hevur bara verið latið sklerosusjúklingum við ávísum sjúkueyðkennum.

Heilivágurin verður í ávísum førum latin krabbameinssjúklingum.

Bara dropar

Talan er um kannabisdropar, men tí tær eru ólógligar at nýta í Føroyum.

Í Danmark fer tó at bera til at fáa náttúrligt kannabis sum heilivág frá 2018.

Talan er um royndartíð í fýra ár til ávísar sjúklingar. Føroyskir heilsumyndugleikar mugu taka støðu til, um royndarskipanin eisini skal setast í verk í Føroyum. 

Miðflokkurin spurdi herfyri landsstýriskvinnuna í heilsumálum, um føroyingar sleppa at vera við í donsku royndarskipanini um kannabis.

GG - rættleiðing

 Ein rættleiðing er gjørd í greinini. Vit høvdu skrivað, at bæði kannabisoljur og kannabisplantur eru ólógligar í Føroyum. Men tað er ikki rætt. Tað eru bert kannabisplantur, ið eru ólógligar. Olja er sum oftast í medisinskum kannabisi. Tað er tó ymiskt, hvussu nógv THC er í teimum ymsu sløgunum av medisinskum kannabisi. THC er rúsandi evnið í kannabis.