- Tíðindi, mentan og ítróttur
Havnin hevur ikki lagað seg til fólkavøksturin
Fólkatalið í Føroyum veksur skjótt.
Fólkatalið í Havn veksur eisini, men ikki so skjótt, sum í restini av landinum.
Í tølum, so eru seinasta árið flutt 233 fólk í Tórshavnarøkið, sum er Havnin, Argir og Hoyvík.
Árið fyri fluttu 386 fólk í sama økið. 153 fólk færri.
- Hetta er ein avbjóðing, sum skal loftast, tí fólk vilja framvegis búgva í Havnini, sigur Annika Olsen, borgarstjóri í Havn.
Húsaprísurin er helst høvuðsorsøkin
Sambært Búskaparráðnum er munurin millum húsaprísin í Havn og aðrastaðni í landinum slakar 1,7 milliónir krónur.
- Tað ger kanska tað, at fólk halda tað vera í so dýrt og velja heldur at keypa sethús aðrastaðni enn í Havn, sigur hon.
Í næstum verða 48 grundstykki tøk á Argjahamri, og ein útstykking verður eisini á Vegnum Langa.
Loysnir eru á veg
Men tað, sum borgarstjórin serliga dúvar uppá, eru stóru pengakassarnir í Føroyum.
Hon er farin undir eina fundarrøð við pensjónsfeløg, bankar, tryggingarfeløg, fakfeløg og vinnuna um at byggja bústaðir í høvuðsstaðnum.
- Fáa vit fleiri leigubústaðir, eldrabústaðir og røktarbústaðir, so hevur tað vónandi við sær, at fleiri sethús verða á marknaðinum, sigur Annika Olsen, borgarstjórin.
Fundarrøðin hevur hilnast væl, heldur borgastjórin. So væl, at hon miðar eftir, at partarnir hava undirskrivað eina avtalu á einum evnisdagi um fjúrtan dagar, tann 27. september.
Nú hevur tað skund at fáa nøkur tøl til vega, so tey vita, hvussu nógvir bústaðir skulu byggjast.
- Endamálið við hesum evnisdegnum er at finna ein leist, sum vit arbeiða eftir, sigur hon.
Tak niður