Tað er hendan mánaðin, at nógv hevur verið tosað um jólamannin, nissur, vættrar og so framvegis.

Summum børnum dámar væl alt hetta hóvastákið, meðan onnur børn ikki eru so fegin um jólamannin, sum kemur við gávum, ella drillinissina, sum ger mjólkina, sum skal í havragrýnið um morguni, grøna.

Men hvussu ávirkar alt hetta prátið um jólamenn og nissur børnini?

- So leingi børnini halda, at tað er stuttligt, og tey á ongan hátt eru bangin fyri jólamanninum, so bilar einki, um foreldrini so at siga lúgva um jólamannin ella drillinissuna, sigur Gurið Simonsen, sum er sálarfrøðingur.

Sambært henni eru jólamenn og vættrar við til at skapa eitt serligt huglag og gera mánaðin spennandi og stuttligan. Men tað er umráðandi, at foreldur lurta eftir barninum.

- Tá barnið byrjar at leggja tvey og tvey saman, kunnu foreldur fortelja barninum, at hetta við jólamanninum passar ikki ordiliga. Tað er eingin orsøk tá til at halda fram við søgunum og royna at sannføra barnið um, at jólamaðurin er til og so framvegis, sigur Gurið Simonsen.

Í morgunsendingini fortaldi hon, hvussu tær ymisku søgurnar á jólum um vættrar, nissur og jólamenn ávirka børnini.