Seinastu dagarnar hava fleiri altjóða miðlar boðað frá, at ógvuslig influensa ger um seg.

Eitt nú í Amerika og Australia eru fleiri fólk innløgd við virusinum, ið nevnist H3N2, og somuleiðis eru hetta virusið staðfest í Europa.

Í Føroyum liggja eisini fleiri sjúk við influensu júst nú. Men sambært Jenisi av Rana, kommunulækna, er talan tó neyvan um H3N2.

- Í læknahúsinum í Gundadali hava vit ikki sæð ella hoyrt nakað um júst hatta virusið, sum annars ger um seg úti í heimi. Tað, vit síggja nógv av, er tann vanliga influensan, sigur Jenis av Rana.

- Tað er torført at sleppa undan influensu, men tað snýr seg um at hugsa nógv um reinføri, serliga við at vaska hendurnar ofta, sigur Jenis av Rana.

Ert tú blivin sjúk ella sjúkur, er ikki nógv, tú kanst gera fyri at stytta um sjúkutíðina.

- Hevur tú fepur, skalt tú halda teg heima við hús. Og annars snýr tað seg um at slappa av og vera góður við seg sjálvan, til mann merkir, at tað gongur rætta vegin aftur, sigur Jenis av Rana.

Í morgunsendingini gav Jenis av Rana góð ráð til teirra, ið dragast við influensu.