Sonja Davidsen, ið arbeiðir sum modell og sniðgevi í Danmark, byrjaði fyri skjótt tveimum árum síðani sína egnu kollektión við undirklæðum.

Undirklæðini hjá føroyska sniðgevanum eru blivin ógvuliga væl umtókt, og kend fólk sum Kylie Jenner vísa seg á eitt nú Instagram í undirklæðunum, ið nevnast OW Intimates.

Men nú hevur stóra svenska fyritøkan Hennez & Mauritz gjørt undirklæðir, ið sambært Sonju Davidsen líkjast alt ov nógv teimum, sum hon hevur sniðgivið tvey ár frammanundan.

- Tað er irriterandi, at ein so stór fyritøka, kann selja eina rúgvu av undirklæðunum, sum vit hava brúkt nógva tíð og orku upp á at sniðgeva, sigur Sonja Davidsen, sum saman við øðrum fór undir at sniðgeva OW Intimates í 2016.

Enn er ikki greitt, hvat Sonja Davidsen fer at gera við støðuna.

- Í løtuni arbeiða vit saman við einum sakførara fyri at finna útav, hvat vit kunnu gera. Tað er ikki sikkurt, at vit kunnu gera nakað sum helst, tí klæðir eru ikki fevnd at lógini um upphavsrætt, sigur Sonja Davidsen, sum enn ikki hevur verið í sambandi við stóru fyritøkuna.