- Tíðindi, mentan og ítróttur
Góðan morgun Føroyar
Í síðstu viku fingu dagstovnar og dagrøktir um alt landið eitt skriv frá Mentamálaráðnum, har heitt verður á tey um at hjálpa børnunum at koma við uppskotum um sangir til Barnasangbók Føroya.
2018 er skýrt at vera "Ár fyri málmenning hjá børnum", og tí er avgjørt, at nýføðingar skulu fáa eina sangbók við føroyskum sangum í vøggugávu frá landinum. Og tað eru listar við sangum til júst hesa barnasangbók, at stovnar og dagrøktir kring landið hava fingið hesa áheitan.
Hjørdis Johansen er námsfrøðingur og hevur í nógv ár arbeitt við børnum og tónleiki. Hon gav eisini út bandið "Hjørdis og genturnar" fyri skjótt 30 árum síðani.
- Barnasangir eru ein mentanararvur. Ja, ofta snúgva teir seg um roykstovur, grúgvur og kærar, men tað er alt partur av okkara søgu. Og søguna læra børnini lættast ivð at syngja hana, sigur Hjørdis Johansen.
Í morgunsendingini greiddi hon frá føroyskum barnasangum og týdninginum av, at børn syngja.